ਹਿੰਦੀ/ ਬੁਢਾਪੇ ਦੀ ਦੌਲਤ

ਮਾਲਤੀ ਬਸੰਤ

ਦੋ ਬਜ਼ੁਰਗ ਆਪਣੇ ਪੁੱਤਰਾਂ ਦੀ ਚਰਚਾ ਵਿਚ ਮਸਤ ਸਨ। ਇਕ ਬੋਲਿਆ, “ਮੇਰਾ ਬੇਟਾ ਅਮਰੀਕਾ ’ਚ ਐ। ਉੱਥੇ ਡਾਲਰਾਂ ’ਚ ਏਨਾ ਧਨ ਕਮਾਉਂਦੈ ਕਿ ਇੱਥੇ ਉਹਦਾ ਮੁੱਲ ਲੱਖਾਂ ਰੁਪਏ ਦੇ ਬਰਾਬਰ ਹੁੰਦੈ।”

ਦੂਜਾ ਬਜ਼ੁਰਗ ਬੋਲਿਆ, “ਮੇਰਾ ਬੇਟਾ ਤਾਂ ਅਰਬ ਦੇਸ਼ ’ਚ ਰਹਿੰਦੈ। ਉੱਥੇ ਤਾਂ ਸੋਨਾ ਮੀਂਹ ਵਾਂਗ ਵਰ੍ਹਦਾ ਐ।”

 ਉੱਥੇ ਇਕ ਤੀਜਾ ਬਜ਼ੁਰਗ ਵੀ ਸੀ ਜਿਹੜਾ ਉਹਨਾਂ ਦੀਆਂ ਗੱਲਾਂ ਸੁਣ ਰਿਹਾ ਸੀ। ਉਸ ਤੋਂ ਰਿਹਾ ਨਾ ਗਿਆ। ਉਹ ਬੋਲਿਆ, “ ਵਿਦੇਸ਼ ’ਚ ਰਹਿ ਰਹੇ ਤੁਹਾਡੇ ਪੁੱਤਰਾਂ ਦੀ ਲੱਖਾਂ ਦੀ ਕਮਾਈ ਤੁਹਾਡੇ ਕਿਸ ਕੰਮ ਦੀ ਐ? ਬੁਢਾਪੇ ਦੀ ਦੌਲਤ ਤਾਂ ਔਲਾਦ ਹੁੰਦੀ ਐ, ਜੋ ਬੁਢਾਪੇ ’ਚ ਆਉਣ ਵਾਲੇ ਦੁੱਖ-ਤਕਲੀਫਾਂ ਤੇ ਬੀਮਾਰੀਆਂ ਵਿਚ ਸਹਾਰਾ ਦਿੰਦੀ ਐ। ਮੇਰਾ ਬੇਟਾ ਭਾਵੇਂ ਥੋੜ੍ਹਾ ਈ ਕਮਾਉਂਦੈ, ਪਰ ਸਾਡੇ ਨਾਲ ਰਹਿਕੇ ਦੁੱਖ-ਸੁੱਖ ਦਾ ਸਾਥੀ ਬਣਦੈ।”

ਤੀਜੇ ਆਦਮੀ ਦੀ ਗੱਲ ਸੁਣਕੇ ਅਮਰੀਕਨ ਤੇ ਅਰਬੀ ਬੇਟੇ ਦੇ ਪਿਉ ਬਗਲਾਂ ਝਾਕ ਰਹੇ ਸਨ।

                                       -0-